醫護人員一忙起上來真係停唔到手,台灣有位護士趁空檔期間叫咗珍珠奶茶外賣,點知遇到病人需要急救,完全唔記得咗有外賣呢件事。直到護士見到自己部電話有成20幾個未接來電,先發現店員喺寒風中等咗佢成40分鐘。店員唔單止無怨言,其一番暖心鼓勵更令事主非常感動,大讚店員:「暖心暖心暖心X100次」。

台灣一位護士網民喺社交平台發文指,前幾日佢哋加護病房忙到水深火熱,趁住一個小小嘅空檔時間,網民就隨口問大家飲唔飲珍珠奶茶,護士們又頸渴又肚餓,紛紛讚成叫外賣珍珠奶茶。點知突然嚟咗個病人要急救,大家一下子又忙碌起來,完全唔記得叫咗外賣。網民發現電話入面有成20幾個未接來電,先再打返俾店家,原來送外賣嘅店員仲喺醫院門口等緊!且足足等咗成40分鐘,而嗰日只有10℃!

網民自己都覺得唔好意思連忙道歉,店員非但無黑面、唔耐煩,反而好體諒護士嘅工作:「我知道你們護理師很辛苦等了一下下,沒關係啦,有喝到飲料就好……你們一定很渴……」網民超感動,仲打算叫店員唔使找錢當貼士,店員無收,只係叫網民俾5星好評就得。

其他網友紛紛留言感謝醫護人員,仲讚店家好體貼:「聽了眼淚都要留下來了,大家都很辛苦」、「大家共體時艱~總是會溫暖的」、「台灣最美的風景,就是暖心」,亦有同係醫護人員嘅網友留言指:「常常一上班就是叫珍奶,直接解決了餓和渴的困擾,然後撐到下班」、「所以常有人誤解護理師很愛喝飲料,其實我們是沒時間吃飯,把飲料當飯吃啊!」

圖:FB@林婷一下吧 icu護理師