早前內地有網民影到四川樂山有一位大叔,佢一邊撐拐杖,一邊抬起建築木材,呢段短片感動咗無數網友。大家稱呼佢為「獨腿大叔」,有人向佢捐款捐物,但都被佢謝絕,他話:「不用捐贈,我要靠自己的努力生存下去!」

呢位「獨腿大叔」叫劉志才,今年54歲,係一位農民。佢喺短片入面只著一件唔厚嘅衫,單腳工作,雖然撐住拐杖,但係行動睇落十分俐落,工作能力不亞于常人。劉志才話,自己15歲嗰年,因上山打柴由樹上跌落嚟,左腿受傷需要截肢。不過佢並無因此消沉,不抱怨、不退縮,撐住拐杖學做各種農活。佢宜家同年過80嘅父親一起生活,除咗農活之外,佢仲會喺附近工地打散工,幫人維修養豬場、搬運建築材料等幫補家計,亦方便照顧父親。除此之外,劉志才仲種咗二三十畝竹子、果樹、茶葉、藥材、黃柏等,但就無請人返嚟幫手,一直由劉志才一手包辦。

而當劉志才辛勤工作嘅短片被擺上網後,迅速爆紅,亦打動咗好多網民,佢哋紛紛留言讚好:「堅強的人都值得尊重」、「努力生活的人最美麗」、「我們有什麼理由不努力」。有熱心人向劉志才捐款捐物,但都被佢一一謝絕。佢話,大家不用捐贈,村入面有幹部等幫助,而佢宜家亦有穩定收入,足以支撐佢同父親嘅日常生活:「我還是要靠自己的努力,生存下去!」

圖:紅星新聞