唔少人都覺得入到Band 1學校,師資好啲,第時升大學容易啲,亦會有較好前途。但係,喺Band 1學校讀書亦唔係想象中咁好,有網民表示自己因為壓力太大,由Band 1學校轉去Band 3學校,個人壓力細咗,反而開心咗。網民仲讚Band 3學校嘅老師好比心機教,更領悟到一個人成績高低其實係睇自己有無恆心、努力過,而唔係單睇學校banding或師資。

有女網民喺facebook專頁「名校Secrets」投稿指,自己曾經喺油尖旺一間Band 1中學讀咗兩年,當時網民全級名次跌一兩名已經好大壓力,晚晚都訓唔好,日日放學都要補課,壓力勁大。網民本身無諗住成為專業人士,只係想畢業之後做設計,所以同父母商量過後,轉咗去Band 3學校繼續學業。而網民嚟到Band 3學校之後,發現根本無坊間傳得咁差,入面嘅老師其實好用心教學生,「見你有心求學已經如獲至寶咁,夜晚任何時候都會覆你問題」,甚至肯教學生做功課教到11點先走。相反,網民就記得以前Band 1學校嘅老師勁功利,「見你成績有潛質先會花時間喺你身上,又或者用好多時間帶課外活動,再唔係一放學就走人,仲早過啲學生走!」

網民續指,雖然Band 3學校嘅學習氣氛一定無Band 1咁好,但其實成績好唔好,「最主要都係睇你有無自己努力,根基打得好唔好,好嘅話去到邊都會好。」網民最後表示自己宜家「讀得幾開心,空間多咗,都無以前咁大壓力。」

網友紛紛留言讚同網民嘅講法:「很欣賞你的態度,要加油」、「寧做雞頭不作鳳尾,除左佩服同加油,都冇咩可以講,反正條條大路通羅馬」、「從來只有學校分banding,學生同老師都唔分banding」。

圖:大公