浸會大學推出「自在社交」網上認知行為治療計畫，結合線上線下服務，採用虛擬實境（VR）技術，俾患者練習點樣社交同面對陌生人，以克服恐懼及焦慮。研究團隊現時正招募六百名社交焦慮患者免費參與，期望佢地嘅社交生活重回正軌。

浸大社會工作系副教授潘佳雁領導嘅研究團隊，喺去年開展「自在社交」計畫，經過一年多時間籌備，推出為期13周，結合線上及線下輔導嘅治療服務。其中為期九周嘅線上模式，患者每個星期通過網頁或手機應用程式參加一節單元，例如睇影片、做練習及自我評估，了解焦慮成因及學習放鬆。

線下服務包括三次面談及兩次電話跟進，其中兩次面談採用「虛擬實境暴露治療」，俾患者體驗五個日常社交情境，包括「參加求職面試」、「做口頭報告」、「上司評估工作表現」、「提出反對意見」及「在公眾地方喝飲品」。患者戴上VR裝置後，可模擬同真人影像互動，練習社交及應付緊張及焦慮。 

社交焦慮嘅患者接觸陌生人或喺公眾地方時，會有不成比例嘅恐懼同焦慮，會湧現負面情緒及出現面紅、冒汗等生理反應。有機構統計，本港有約24萬名患者，但精神科醫生及臨牀心理學家僅約千人，未能夠應付龐大需求，加上患者抗拒治療，不足一成人會求助。 

潘佳雁稱，今次計畫係專為港人而設，示範個案都係以廣東話及本地情境，而線上治療彈性大，可按患者個人步伐進行，VR暴露治療亦有相當高嘅成本效益，「先讓患者喺虛擬環境面對恐懼及焦慮，之後面對真實環境，就比較容易應對」。治療師同輔導員會從旁協助，團隊會喺療程完結三個月及半年後再評估患者狀況。 

研究團隊招募六百名年齡介乎十八至七十歲嘅患者免費參加，參加者要進行面試，以確定有社交焦慮先會展開療程；團隊亦擬為約百名本地心理健康專業人士提供培訓，整個「自在社交」計畫預計喺兩、三年內完成。計劃亦獲研究資助局研究影響基金及浸大資助逾六百萬元，並同瑞典斯德哥爾摩大學、利民會及明愛全樂軒合作。 

圖片來源︰Unsplash@Minh Pham