麵包鋪買唔曬嘅麵包會點處理?日本東京一家叫做「夜のパン屋さん」(夜之麵包店)嘅麵包鋪,就專門收集各間麵包鋪賣剩嘅麵包嚟賣。但估唔到嘅係,呢間只會喺每個星期四、五、六晚上七點半至十點開鋪嘅夜之麵包店,只係開業兩個幾月就成為熱話,吸引好多日本人慕名前往排隊買包。有時未開鋪門口已經開始出現人龍,麵包更只係喺一個鐘內就沽清,非常受歡迎,究竟佢有咩咁特別?

夜之麵包店位於東京神樂坂一間書店旁邊,開店之前,店員會去附近麵包鋪搜集佢哋賣剩嘅麵包,並用較低嘅價錢入貨。至今已經有11間麵包鋪同夜之麵包店合作,佢哋都表示:「能夠把剩餘的麵包都賣光,當然非常讚成!」呢個亦係夜之麵包店其中一個開店初衷——減少浪費食物。

除此之外,夜之麵包店仲有一個更重要嘅使命,就係支援弱勢社群。原來夜之麵包店係由專門為露宿者提供支援嘅社福團體「BIG ISSUE」策劃,一開始團體會為露宿者提供喺街上賣雜誌嘅工作機會,助佢哋自力更生。但受新冠肺炎影響,雜誌銷量大跌,亦影響員工嘅生計。由於夜之麵包店只喺夜晚營業,員工就可以日頭賣雜誌、夜晚賣麵包,同時兼顧兩份工作,幫補家計。夜之麵包店發起人之一嘅枝元小姐表示,麵包鋪開業以來,除咗減少食物浪費,更重要嘅係嚟買麵包嘅客人都非常享受過程。

圖:Twitter@夜のパン屋さん