喺街度見到有垃圾,隨手執起丟落垃圾桶係愛護環境嘅舉手之勞,但台灣有個媽媽反而以此為恥,仲叫自己嘅小朋友千祈唔好學,實在令人擔心,家長太過保護自己仔女反失去生活教育嘅機會。

有網民喺facebook群組「爆怨公社」發文指,有一日佢湊小朋友返學之後,見到路邊角落有堆被人隨處丟棄嘅煙頭,於是隨手執起,諗住掉入垃圾桶。點知佢執起煙頭後,有個路過小朋友又有樣學樣,執咗個煙頭起身,小朋友母親即刻喝止:「不要撿那個東西!地上都是細菌!」小朋友就天真咁回應話:「可是那個叔叔就在撿啊」,母親聞言更駁斥:「叔叔在撿那是他喜歡髒東西!不要學他!」網民聽到後感到不是味兒,於是直接同小朋友講:「沒有帶手套或夾子是叔叔的錯,但叔叔我愛護環境,你喜歡出門就看到滿地都是垃圾嗎?」佢更提醒小朋友,掉垃圾後要好好洗手,並好言相勸該名母親:「教育孩子不是只有老師的職責,家長的機會教育都是孩子內心成長的重要關鍵!」網民指該名母親聞言似惱羞成怒,急急拉小朋友入學校,仲念念有詞話「一早就遇到神經病」云云,而小朋友就偷偷向網民揮手道別。

網民指,明白疫情下家長更緊張小朋友嘅衛生情況,亦會擔心仔女喺不知情下有樣學樣反受傷害,但佢認為愛護環境嘅教育唔應該因過度保護小朋友而被扭曲:「對,那是會弄髒,但不代表我們可以教育孩子這種扭曲的觀念。人可髒,心不能髒!」

呢個貼文獲得唔少網友留言讚賞:「你做了好典範,手髒了可以洗乾淨,環境髒了誰要洗乾淨」、「孩子都是無辜的,有好榜樣可以學習真是他的福氣,很多事情都是恐龍家長教育的方式不對造成偏差」、「現在很多家長沒有想過身教大於言教,沒想過家庭教育這塊會比學校的教育來得重要」。

圖:FB@爆怨公社