細心觀察周圍環境,就會發現原來身邊有唔少人需要幫助。美國有位女待應Flavaine Carvalho就因為喺餐廳觀察到有個11歲男童身上有多處傷痕,隨行父母仲唔俾佢食嘢,於是暗中寫紙條問男童:「你需要幫助嗎?」男童點頭示意,Flavaine即刻報警救出男童,獲當地警方大力表揚。

據外媒報道, 1月1號喺美國奧蘭多一間餐廳入面,Flavaine接待咗一家人來用餐,但佢發現隨行父母大快朵頤,唯獨坐喺一邊嘅男童無嘢食。Flavaine於是上前詢問是咪食物有問題,男童父親就話男童會返屋企食飯,所以無幫佢叫餐。但Flavaine留意到,男童眉間有一條好大嘅傷痕,而且臉、眼、手臂有多處傷痕,神情悲傷。Flavaine認為男童可能被虐待,於是佢暗中寫咗一張紙條,擋住男童家人嘅視線,秘密傳俾男童睇。多次嘗試之後,男童終於見到,仲微微點頭示意。Flavaine即刻報警求助:「這男孩有瘀傷,沒有吃飯,我不知道該怎麼辦,可否給我一些建議?」

警方迅速到場救出男童,並將佢送到醫院接受治療。原來男童長期被34歲繼父虐待,繼父唔單止毆打佢,更會將佢倒掛喺門上、唔俾佢食飯。而31歲生母雖然一直知情,但從來無送囝囝去醫院治理傷口。警方最後以虐待兒童等罪名,拘捕男童嘅繼父同生母,並喺社交平台上公開表揚Flavaine嘅英勇事跡。 

圖:FB@Orlando Police Department