想演奏音樂,一定要用專業樂器?梗係唔係喇,西安有位叫逸飛嘅能人可以將蔬果、瓷磚、鋸等大改造,變成可以演奏嘅新樂器。

今年43歲嘅逸飛,出生喺一個普通家庭,父親係一位小學音樂老師,逸飛自幼受父親熏陶,亦學習咗樂器演奏,之後仲以此謀生。不過隨住社會發展,演藝市場競爭激烈,為咗突圍而出,逸飛創作出「鋸子音樂」,令鋸子好似小提琴咁演奏出動人悅耳嘅樂曲,大受觀眾喜愛。

逸飛嘅「鋸子音樂」係佢師父教嘅,佢當時覺得好神奇,而演出效果亦非常好,於是啟發咗佢去探索各種新奇樂器。喺一次偶然嘅機會,逸飛發現蔬菜能够「發聲」,之後佢就開始搜查資料,去街市買蔬果試聽音色。試過為咗做出滿意嘅淮山笛,逸飛刻壞咗幾十斤新鮮淮山。好彩皇天不負有心人,逸飛最終於做出紅蘿蔔木琴、淮山笛、南瓜排鼓、薯仔木魚等新型樂器。

逸飛話:「由於蔬菜有脆弱性,易腐爛等特性,因此在製作過程中需要特別小心,同時也要注意存放方式,盡可能讓其耐用,所以製作一件蔬菜樂器相對比較難。」佢表示,雖然蔬菜樂器喺音色方面無傳統樂器咁清脆、響亮,但佢哋有自己嘅獨特性,演奏起來非常好聽。逸飛仲同朋友喺2012年組咗「蔬菜樂隊」,以蔬菜為演奏樂器表演,廣受觀眾喜愛。不過逸飛並無止步於此,佢又將魚線、口服液樽、打氣筒、瓷磚、塑膠管等物品改造創新,賦予音樂魔力。

圖:中新網