主教山配水庫成為全城熱話，可惜暫時大家都唔可以參觀住。其實配水庫同期仲有唔少建築都值得一遊，今次就帶大家「逆流而上」暢遊九龍水塘，睇古蹟之餘仲可以望吓靚景添！

香港第四個水塘

首先講講主教山同九龍水塘嘅關係！原來隨住1898年英國租借新界之後，界限街以北嘅九龍山脈正好用作集水區。主教山配水庫於1904年落成，就係「九龍重力自流供水系統」計劃嘅其中一部分，食水由源頭九龍水塘，經地下輸水隧道，轉至荔枝角濾水池、大埔道地下輸水管道、主教山配水庫、油麻地抽水站，繼而分發至唔同嘅供水管道。

於1901至1910年間興建嘅九龍水塘，不但係香港第四個水塘，亦係因應九龍半島人口不斷增加而興建嘅首個水塘。九龍半島嘅供水方式隨住九龍水塘落成而改變，自此水塘所儲存嘅雨水，正式取代井水同埋由油麻地抽水站所運送嘅地下水源，令到九龍半島成為宜居之地。

五項歷史古蹟

九龍水塘位於金山郊野公園之內，位置非常便利，大家只要坐巴士喺大埔公路落車就去到。由於水塘範圍並唔係好大，好容易就可以一口氣行晒九龍水塘、九龍副水塘、九龍接收水塘以至石梨貝水塘，全程大約只有五公里半的路程，而且沿路有樹蔭遮蔭，高低起伏不多，難度極低，絕對係入門級嘅路線。

現時九龍水塘有五項歷史建築物，於2009年被列為古蹟，包括主壩、主壩水掣房，溢洪壩、溢洪壩記錄儀器房及記錄儀器房，都係建於1901年至1910年，而且全部都好集中，要一次過睇晒非常方便。

其中九龍水塘嘅主壩最值得一睇，呢座水壩係以花崗岩建成，採用弧形設計，非常獨特。另外，為咗增加儲水量，九龍水塘嘅水壩亦起得好高，企喺主壩上面更加可以遠眺九龍半島嘅景色添！

最後都要提提，雖然水塘群以九龍為名，但根據現時嘅地區行政，其實係位於新界沙田區架。

圖片來源：LOOOP.HK、古物古蹟辦事處、發展局、水務署、漁農自然護理署

九龍水塘古跡分布圖

九龍水塘是香港第四個興建嘅水塘，亦係新界第一個水塘。