上集,圈記者除咗做咗一個實測,仲訪問咗街坊對「藍雪櫃」嘅睇法。今集,圈記者就帶大家深入瞭解一下「藍雪櫃」背後動人嘅故事。

簡仲文先生除咗係善行體育基金CEO,仲係今次佐敦「藍雪櫃」發起人。簡仲文係一位喺香港土生土長嘅巴裔人士。簡表示,佢一直都有打算弄一個「食物銀行」嘅活動,而睇完《麥路人》呢套電影就更加推動佢做呢件事,啟發佢可以用雪櫃嘅形式實行。

簡表示,佢同旁邊垃圾站主管好熟,主管問佢要雪櫃做咩,簡就話想用來擺食物幫人,主管直言「吓!你咁傻嘅」,簡就話冇主管幫手就唔會出現「藍雪櫃」呢項善舉。

「藍雪櫃」看似平平無奇,原來無意中改變咗某某嘅人生軌跡。簡表示,有一個人每一個星期都會來拎一袋物資,後來同佢講「我來埋今次」,簡以為佢係患上咗咩病,原來佢係搵到兼職。仲同簡講曾經有諗過輕生,係「藍雪櫃」冇令佢行上絕路。

「藍雪櫃」亦令人恍然大悟,擁有雪櫃唔係必然。有一位露宿者駐足喺雪櫃旁好耐,佢突然話「我好耐冇打開過雪櫃」,原來佢已經在外流浪太耐。呢一幕亦令企喺一旁目睹一切嘅夫妻莫名感傷。 

簡表示,最希望「藍雪櫃」可以功成身退,因為咁樣先代表人人都生活得開心。簡又憶述自己曾與父親相處嘅點滴及困苦嘅生活,但佢表示只要大家多聆聽及關心周遭嘅人,香港會一直咁溫暖。 

資料來源片段︰Facebook@Blue Fridge Project 藍雪櫃&善行體育基金