發泡膠成本低,質地又輕又易爛,通常都會用嚟製造一次性用品,但日本有個男人竟然用發泡膠嚟整獨立屋,索價高達3000萬日圓(約港幣223萬)!究竟發泡膠屋點解會咁貴?原來佢係特製嘅發泡膠,可以隔熱、抗震、防火、防風等,好處多多。

日本埼玉縣有個男人,花咗3000萬日圓打造咗4個連埋一齊嘅巨蛋形獨立屋,呢4座獨立屋特別之處在於佢係用發泡膠做嘅。聽落好似好唔實用咁,但屋主解釋,發泡膠屋有冬暖夏涼嘅特性,就算係30℃以上嘅炎熱天氣,只要開一部冷氣就可以令全屋都維持涼快舒適。唔單止係咁,發泡膠屋仲有超強嘅防地震、抵抗颱風設計,非常適合地震頻繁嘅日本,日本有啲避難設施都係用呢種材料製造。

曾經有電視台訪問製作呢種發泡膠屋嘅公司,原來呢種發泡膠唔係我哋平時用開嗰隻質地,佢比一般發泡膠密度高好多,更有4大優點:第一就係材料超輕、方便運送;第二係塗上特製塗層嘅發泡膠,可承重650kg以上,非常堅固;第三係唔易燃,直接用火燒都唔會溶;發泡膠嘅流線型設計唔單止令佢更防風,就算落雪屋頂都唔會積雪。

發明巨蛋形發泡膠屋嘅係呢間公司嘅社長北川勝幸,佢本來係經營和菓子公司嘅。有一日,佢見到自己公司出品嘅好似大福咁嘅小饅頭,就諗:「如果將裏面嘅紅豆餡全部挖出來,住喺入面應該好開心!」於是,功能強大嘅防災發泡膠屋就誕生咗!

圖:Japan Dome House