自從禁咗晚市堂食以來,食肆嘅生意更加雪上加霜。豈料呢個時勢,有人非但唔體諒,竟然仲惡作劇。將軍澳一間車仔麵店,尋日(12號)下午接到一張成千元蚊嘅外賣單,點知當店員將食物送去訂單地址嗰陣,對方竟聲稱被人「整蠱」而拒絕接收外賣,麵店最後只可以默默承受損失,最後鄭重呼籲:「請尊重所有餐飲業的同事並珍惜食物!」

將軍澳榕記車仔麵喺其facebook專頁發文指,尋日收到一個自稱係劉生嘅人嘅電話,點咗總共1021蚊、約十幾人份量嘅外賣叫佢哋安排送去隔籬嘅地產舖。麵店同事見近近哋,對方又留低哂公司電話同私人電話,不疑有他,極速起貨並安排3名店員送外賣。點知,地產舖派出一個態度極差嘅職員要求店員離開,話劉生今日無返工,仲趕哂店員出門口,搞到負責跟單嘅女店員委屈到喊!之後麵店再聯絡劉生,對方竟聲稱被人整蠱,麵店最後因呢場惡作劇要自己承擔返所有損失,直斥肇事者:「唔雪中送炭都算啦!點解要咁樣浪費同事時間同心機,仲要浪費咁多食物!」

貼文引起網民熱議,有好心網民想俾錢買呢張訂單,不過麵店就回應:「始終不應將別人不要的給其他客人,所以老闆和同事們已食得就食,盡量不浪費。」有網民鬧爆肇事者,要麵店向地產代理監管局投訴;亦有網民建議麵店,下次收到金額較大嘅單應先收按金或要求對方以信用卡付款;唔少網民留言鼓勵麵店:「加油呀!好人自有好報!壞人自有天收!若然未報只是時辰未到!」

圖:FB@榕記車仔麵