去年11月,佐敦吳松街出現咗一個「藍雪櫃」,仲寫住「取你所需,送你所想」(Give what you can give, take what you need to take),入面擺放咗各式各樣嘅物資,希望可以幫到有需要嘅人。

對於呢項善舉,好多人都覺得好驚喜,圈傳媒記者早前就到佐敦訪問咗幾位街坊,好多都認為「藍雪櫃」可以幫到人,當中有位受訪者更認為可以「發揮到一個互助精神」添。

之後,記者又做咗一個實測,測試所擺放嘅物資用時幾耐就會被有需要人士拿走。結果令人震驚,記者所擺放嘅杯麵同喉糖不消5分鐘就被拿取,可想而知,社會上有好多人都需要援助。

仲有一個好消息就係……有另外一個(2號)「藍雪櫃」於17日正式喺佐敦文苑街47號地下登場,希望更多有需要人士可以藉此得到幫助。而兩個雪櫃嘅「搞手」——善行體育基金創辦人簡仲文先生及油尖旺地區顧問陳少棠先生都分別呼籲大家支持手1號及2號「藍雪櫃」,大家行經佐敦嘅時候,記住去支持吓啦!

資料片段來源︰FB@Blue Fridge Project 藍雪櫃