南京有一對好心夫婦,喺一個落雨天救咗受傷跌倒喺路邊嘅劉師傅,好心人唔單止送劉師傅去醫院,仲幫佢墊付咗3000蚊(約港幣3590)手術費。點知好心人幫咗人之後,乜都無留低就走咗。直至兩年後,劉師傅先搵到恩人,當面向佢致謝。

劉師傅係徐州人,隻身前往南京打工,2019年2月一個落雨嘅晚上,劉師傅騎住助力車撞到護欄,雖然即刻恢復意識但就全身郁唔到,只能夠呼救。路過嘅幾架車都唔敢停低,只係有人喺佢身邊放咗幾架共用單車,等劉師傅不至於被路過嘅車輛再撞多次。呢個時候,一對年輕夫婦停落嚟,幫劉師傅擔遮遮雨,喺等待救護車嚟嘅途中,佢哋怕劉師傅會昏迷而不斷同傾計。就算將劉師傅送入醫院,好心夫婦都唔放心,買咗補品去探佢,仲墊資3000蚊等劉師傅可以盡快做手術。

安頓好劉師傅後,好心夫婦連姓名都無留低就走咗。劉師傅隨後通過醫院得知好心夫婦嘅電話,佢康復之後一直想還錢俾好心人,想當面向佢道謝,但好心人就拒收劉師傅嘅還款,仲叫佢好好休養。直至舊年年尾,劉師傅囝囝喺網上見到好心人嘅名,得知其中一位好心人原來係南京鄭和外國語學校嘅徐老師,於是劉師傅準備好感謝信、錦旗親自到學校向徐老師道謝。

徐老師對救人嘅事表示:「我們只是做了應該做的,不用放在心上的。」佢話,雖然當時嘅3000蚊對佢哋嚟講唔算多又唔算少,但唔係以借嘅方式俾劉師傅,所以唔存在還。況且劉師傅宜家收入唔穩定,傷病之後亦需要錢,所以無理由收佢嘅錢。徐老師仲話,佢以前嚟南京都遇到好多貴人幫忙:「一直很感恩南京這座城市和在這裡遇到的人,所以我也想把這種正能量傳遞下去,和劉師傅的這段緣分讓我心裡很踏實。救人的事沒什麼,我給自己豎個大拇指就夠了。」

圖:紫牛新聞