現時正值冬季流感高峰期，唔少專家呼籲市民接種流感疫苗，保障個人健康。但喺正生書院嘅學生就「一針難求」，好彩有好心人自發前往免費為學生打流感針。

正生書院屬於私立學校，不獲涵蓋衞生署嘅流感疫苗學校外展服務，學生難以接種疫苗。劍苗醫療主席黃卓健有見及此，主動聯絡校長陳兆焯，並帶同團隊免費幫學生打流感針。

正生書院位於大嶼山芝麻灣，地理位置偏遠，由長洲到正生書院船程需要20分鐘，喺市區出發就需要一個多小時。校長擔心外出打針反而增加感染風險，指學生基本上唔會離開校園。得知有醫療團隊願意上門提供疫苗接種服務，陳校長十分感激，盼望透過注射疫苗減低同學互相傳染嘅風險。

促成今次義務工作嘅原因，源自劍苗醫療主席黃卓健5年前嘅一次參觀。當時佢以禁毒署委員小組成員身份參觀正生書院，印象深刻，指學生有禮貌，會主動打招呼；早前佢得知正生書院面對經營困難，就有打算喺能力範圍內幫助正生師生。

劍苗醫療一直有為有需要人士預留疫苗，早前優先為400名前線長者清潔工接種疫苗，今次仲免費為正生學生提供服務。運送疫苗到正生唔係一件容易嘅事，團隊需要揹30磅冰袋，保持疫苗喺恆溫2至8度。。

圖片來源︰正生書院

正生書院校長陳兆焯同劍苗醫療團隊嘅合照。

醫護人員為正生書院嘅學生打疫苗。