《哈利波特》風靡全球,唔少人都想變成霍格華茲嘅學生,喺入面學魔法。最近台灣台南市郊嘅糖廠,經過重新規劃,將其中一座日治時代嘅舊倉庫,打造到好似霍格華茲咁有魔幻feel,粉絲們又多個打卡朝聖好地方喇~

呢間具有百年歷史嘅台灣糖業公司仁德車路墘糖廠,位於台灣台南市郊嘅十鼓仁糖文創園區,該園區喺2005年開始重新規劃,並由國際知名設計師葉世宗操刀活化,將閒置多年嘅糖廠打造成為亞洲第一座鼓樂主題國際藝術村。舊年年尾,園區舊倉庫用飛天書、舊書櫃、貓頭鷹、飛天掃帚等做裝飾點綴,望落就好似工業風嘅霍格華茲咁,超級夢幻。

園區佔地7.5公頃,入面仲有「煙囪溜滑梯」、「天堂鞦韆」等活動同文青打卡位。

圖:FB@十鼓仁糖文創園區