呢排天氣轉凍,個個都出動羽絨頸巾等裝備禦寒保暖,但對於唔少基層、露宿者嚟講,呢啲禦寒裝備都係奢侈品。有好心網民Debby就同朋友夾份網購咗200條防風防水長褲,捐贈俾銀杏館,銀杏館再轉贈基層人士。Debby仲開心咁話:「這是我淘寶生涯中最有意義的一次。」

Debby喺Facebook群組「淘寶開心Share」發帖指,日前買咗200條防風防水、內有抓毛嘅長褲,直接送到油麻地銀杏館會址,再捐贈俾露宿者、獨居長者等有需要人士。佢表示,發文出嚟唔係想得到大家嘅讚賞,「而是希望籍此可影響到就算是1%的谷友,可以伸出援手幫助一些弱勢社群。施比受更有福,為善最樂,福有攸歸!」

社企銀杏館除咗派發免費「福飯」俾基層人士醫肚之外,義工們最近更堅持喺寒冷天氣警告下,送寒衣俾基層、弱勢社群,等佢哋唔使單獨捱過寒冬。銀杏館更喺社交平台表示,「請轉介有需要禦寒衣物者到銀杏館油麻地店(彌敦道385號平安大廈一樓)到取寒衣,或請你到來店領取衣物,送給身邊有需要寒衣的個案!」

圖:FB@銀杏館