正所謂好工難求,好同事亦如此。有網民喺網上分享一段慘痛經歷,指自己被前同事投訴打字大聲,上司唔幫佢不特止,更落井下石,仲暗指如果網民同佢發生關係,就幫佢保住份工。網民毅然轉工,好彩之後遇到好上司開解,終於放低上一份工留低嘅陰影,更直言:「我好榮幸做到佢嘅下屬」。

網民喺facebook專頁「奴工處」投稿指,自己上一份工係負責輸入數據,但竟然因為打字太大聲而被新入職半年嘅40歲女同事投訴,話網民「搞到佢心臟病,甲狀腺水平高要睇醫生,但從來都冇提供過醫生證明。」上司收到投訴後,只叫佢「打字細聲啲,唔好影響其他同事。」網民照平時咁做嘢,但女同事就同其他同事,包括上司夾埋講說話佢聽:「啲人冇家教架,打字咁大聲」、「食屎都細聲過佢喇」、「咁變態嘅人都唔知點解要生佢出嚟」。上司更隱晦咁話,如果網民同佢發生關係嘅話,可以幫佢留喺度繼續做。網民最後辭咗職,到last day嗰日更加喊住走。

之後網民返新工,都好小心翼翼咁打字、去聚會,驚被人鬧、被排斥,搞到自己壓力好大。上司發現佢嘅情況,直接同佢了解,得知網民喺舊公司經歷後,上司第一反應係:「痴線架?打字都覺得嘈,返屋企瞓覺喇,唔使做呀」,仲同網民講:「請你返嚟係做嘢,你做到嘢就得,聚會係閒事。」網民當下好感動,覺得終於有人撐佢,可以令佢慢慢放低過去,佢好感激上司,表示「好榮幸做到佢嘅下屬」。其他網友紛紛留言撐網民:「你轉左公司冇人話大聲,就證明係人既問題啦」、「笑爆,如何返寫字樓無打字聲,同坐巴士投訴巴士引擎嘈有咩分別」、「打字大聲一定係keyboard問題,咁樣夾埋講一個人就係人事問題」,亦有網民突破盲點:「我想知點解大媽會知道食屎細聲」。

圖:網上圖片