高血壓係現代人常見嘅疾病之一,而高血壓引起嘅胸主動脈瘤更加係香港最常見嘅死亡原因之一。不過,胸主動脈瘤無明顯臨床症狀或表徵,傳統身體檢查難以發現,而使用電腦斷層掃描檢查成本又高。香港中文大學醫學院一項最新研究證實,手提心臟超聲波掃瞄器可有效篩查胸主動脈瘤,尤其適合門診或一般診所應用,陽性預測值達92%。

胸主動脈瘤唔係腫瘤,而係一種血管病變,會令胸腔嘅主動脈出現永久性擴張。中大醫學院外科學系心胸外科組名譽臨床副教授黃鴻亮解釋指,當胸腔嘅主動脈血管壁變薄弱,血液會不斷將血管壁向外推,令血管好似氣球咁膨脹,形成胸主動脈瘤。萬一出現主動脈撕裂或破裂等併發症,病人會大量出血,甚至猝死。就算要做手術,難度亦極高,且風險好大。最麻煩嘅係,九成半主動脈瘤患者都無任何症狀。

為此,中大醫學院研究團隊喺2016年6月至2018年7月期間,喺附屬嘅高血壓診所招募咗1529名平均年齡62歲嘅華人高血壓患者,參與研究手提心臟超聲波掃瞄器是否能有效篩查胸主動脈瘤。研究結果發現,38個主動脈直徑≥ 4.5cm嘅患者,進一步接受電腦斷層掃瞄之後,有35個確診為主動脈瘤,手提心臟超聲波掃瞄器檢測胸主動脈瘤嘅陽性預測值達92.1%,證實利用手提心臟超聲波掃瞄器,為高血壓病人篩查胸主動脈瘤喺臨床應用上十分可行。而每個病人只需約10分鐘就可以完成掃描,而醫生只需要接受30分鐘培訓,並喺監督下完成20至30個病例,就可以獨立應用於臨床檢查。

最後,中大醫學院賽馬會公共衞生與基層醫療學院黃至生教授更提醒市民,要多加注意高血壓風險,並強烈建議市民由18歲起,每兩年最少檢查一次血壓。此外,採取健康嘅生活方式亦有助預防、控制高血壓。

圖:中大