近期香港最著名嘅山,當然就係主教山啦!不過,喺成為人所共知嘅古蹟之前,主教山其實係當地街坊嘅晨運樂園,大家會喺呢度健身、傾偈吹水,甚至打乒乓波,可以話,主教山係當地人自發嘅「公共空間」!

高70米 難度極低
主教山高70米,又名窩仔山,應該源於昔日山下嘅窩仔村,而「主教」就好可能同山上嘅巴色差會有關,呢座古老建築一直到80年代先至被深水埗崇真堂取代。
主教山位於大坑東球場北面,距離石硤尾站、太子站同深水埗站都唔算遠,非常方便,想行呢座小山,可以選擇由太子或石硤尾上山。如果選擇前者,可以先由界限街轉入西洋菜北街,向北行到盡頭再轉右,到達棠蔭街山邊休憩處,會發現有條小山路,沿路而上,就可以到達主教山啦;假如由石硤尾出發,就可以沿巴域街往上走,經過戒煙輔導中心之後,有條小小石級,就係主教山嘅入口。雖然兩邊都係上斜,不過都好易行,大約15分鐘就可以「攻頂」,難度極低!

設施齊備 人人共享
其實喺政府眼中,主教山係一座配水庫,而山上嘅石級亦唔係「行山徑」,政府並無預計呢度會成為巿民休憩熱點,不過喺街坊自行「管理」之下,一切都井井有條,而且仲有唔少「設備」添!例如沿路上山,會見到一堆堆被遺棄嘅神像,然後叢林中會發現一啲的小空地,不但設有長櫈,甚至仲有乒乓波枱,名副其實係一個「公共空間」。
主教山頂仲有一個小平地,被鐵絲網圍住,但四周放滿健身設備:健身單車、單槓、吊環、韆鞦等等,都係俾街坊使用,可惜呢度現時正進行工程,唔建議大家冒險走入去啦!
雖然主教山上滿布樹木,以致無乜景觀,同嘉頓山更係無得比,但正因為咁樣,呢度少咗啲鍾意影相打卡趁熱鬧嘅人,嚟到呢度,反而有種鬧市中難得寧靜同街坊味道!
圖片:LOOOP.HK


如果由太子出發,可以先由西洋菜北街向北行,行到盡頭轉右。
到達棠蔭街山邊休憩處,就會發現有條小山路,沿路而上,就可以到達主教山啦。


沿路上山,會見到一堆堆被遺棄嘅神像。
山上滿布樹木,沿途都是林蔭,大樹好遮蔭,但與此同時又遮擋景觀。
叢林中會發現一啲的小空地,不但設有長櫈,甚至仲有乒乓波枱,名副其實係一個「公共空間」。


間中喺樹木之間都可以望到山下景色,不過同嘉頓山就無得比啦!
主教山頂有個小平地,被鐵絲網圍住,四周放滿健身設備,可惜呢度現時正進行工程,唔建議大家冒險走入去啦!

假如由石硤尾出發,沿巴域街經聖方濟各英文小學往上走,有條小小石級,就係主教山嘅入口。


主教山地圖