61歲嘅英國駐重慶總領事Stephen Ellison早前喺重慶小鎮河邊散步嗰陣,發現一個年輕女子跌落水。Stephen即刻除鞋落水救人,佢救人嘅事跡亦被網民瘋狂洗版讚好,不過佢本人接受採訪嗰陣謙稱,入水救人並唔係咩「重大決定」,佢只不過係「最快脫掉鞋子」嗰個人。為咗表彰Stephen嘅善舉,重慶市見義勇為基金會頒發咗「重慶市見義勇為特別獎」俾佢,而Stephen就表示會將呢筆5萬蚊嘅獎金全部捐贈俾慈善機構。

事發當日,有目擊者影到一位年輕女子喺水入面掙扎,無幾耐更加面朝下浮喺水中。Stephen見狀即刻除鞋跳落水營救,岸邊旁觀者向佢哋拋下一個有繩嘅救生圈。Stephen表示,女子當時已失去知覺,無呼吸,好彩將女子救上岸之後,佢又可以呼吸返。被救女子亦無大礙,只係受到驚嚇,佢仲約咗Stephen同佢嘅屋企人共進晚餐。英國駐華使館亦喺社交媒體發帖表示,所有人都為重慶領事Stephen嘅舉動感到無比驕傲。

之後,Stephen收到唔少中國人嘅留言同肯定,並向為佢提供幫助嘅村民致謝,仲將重慶市見義勇為基金會頒俾佢嘅5萬蚊獎金全部捐贈俾一間慈善機構。

圖:微博@澎湃新聞,Twitter@UK in China