狗狗天生活潑好動。早前玻利維亞有隻流浪狗狗意外闖入Potosi一個足球比賽,仲叼咗隻球鞋喺場上玩。比賽因此要暫停,最後由球員Raúl Castro直接抱走狗狗收科,而狗狗活潑呆萌嘅樣被傳媒報道後亦意外爆紅。不過狗狗喺闖入球場2日後不幸被車撞倒,球員Raúl Castro得知消息更直接收養咗呢隻狗狗,狗狗因禍得福搵到頭好住家,真係可喜可賀~

事源喺上年12月24號,Potosi一個足球場正舉行一場甲級足球聯賽。喺開賽大約一個鐘頭後,一隻全身灰白色嘅流浪狗狗突然闖入場內,仲叼走後備守門員一隻釘鞋喺場上跑來跑去,跑到攰更直接停低咬球鞋,玩得非常開心。比賽不得已停咗3分鐘,裁判同球員上前想趕狗狗離開,點知狗狗唔走不突止,仲開始賣萌。最後由球員Raúl Castro出馬,直接抱狗狗離開球場。

呢段小插曲令狗狗意外爆紅,2日後,有人發現呢隻狗狗被車撞傷,企唔到起身,只能瑟縮喺路邊非常可憐,有目擊者通知動物收容中心將佢送去接受治療。Raúl Castro得知消息後,即刻聯絡收容中心,最後正式領養狗狗,仲幫佢改名做Cachito,為呢段球場上嘅緣分寫下圓滿結局。

圖:FB@Nitro Deportivo,網上圖片