九龍城一個老舊社區但只要你細心發掘,就少充滿驚喜事物例如呢度有個地方,係紀念唐代名將郭子儀!你知道嗎?

位於沙埔道嘅香港郭汾陽崇德總會,係郭氏紀念太祖郭子儀嘅地方,郭子儀係唐代名將,嚟自中原,後來郭氏嘅一代祖經福建嚟到潮州,之後再開枝散葉,到咗四十年代,唔少潮州人移居香港,因此喺香港都可以搵到郭子儀嘅後人。

九龍城除了有祭祖嘅地方,仲有一間天后廟,不過九龍城到處都係大廈,邊度有位置興建廟宇呢?原來就係位於一棟唐樓嘅二樓。據九龍城天后會負責人柯太解釋:「呢個天后會發源地係九龍城沙埔道,當年興建機場,需要搬走天后,兜兜轉轉,天后娘娘就入到城寨之內。但到咗1989年,香港政府要清拆城寨,要搬走天后,但當時老人家唔識得向政府爭取換番一塊地,只收咗政府一筆錢,所以就喺呢度買咗個二樓單位供奉天后娘娘。」

天后不斷搬家,但有一群神獸卻長駐一個地方。原來喺馬頭角十三街,當中11條街都係以中國傳統神獸命名,有龍有鳳仲有麒麟,依家佢哋不但係街名,仲會走出嚟同大家見面呢!

躍變‧龍城 傳訊及推廣主任伍麗微(Christy)表示,佢哋設有「躍變‧龍城」嘅App,大家可以走進互動地圖,睇睇九龍城步行徑上有邊啲地標,另外仲有一啲AR Game,其中十三街照相機,大家去到相關地標,並且選取一啲神獸,就可以同佢哋合照,喺互動之下,不但更加好玩,亦可以加強對呢個社區嘅認識。

小小嘅香港,其實充滿驚喜,只係視乎你有無細心發掘!

 鳴謝:香港郭汾陽崇德總會、九龍城天后會、「躍變‧龍城」九龍城主題步行徑