癌症患者要負擔嘅醫療開支本來就大,又撞正新冠肺炎打擊經濟,增加咗唔少患者嘅經濟負擔。美國一位腫瘤內科醫生Omar Atiq喺結束經營咗30年嘅癌症醫療中心之後,放棄向200多名患者追討之前結欠嘅65萬美元(約港幣500萬)醫療費用,Omar表示目睹幾十年來唔少患者因無錢而無法接受治療,或為咗治療而傾家蕩產,所以決定將病人欠下嘅醫療費用一筆勾銷,希望為社區付出微薄心力。

Omar舊年3月關閉咗營業近30年嘅癌症醫療中心,之後同會計公司結算患者總共積欠嘅醫藥費達65萬美元。但Omar好快就意識到有啲人無力償還債務,於是同太太商量後決定放棄追討患者所有醫藥費。Omar表示患者唔單止要顧慮身體狀況、生活品質、壽命、家庭同工作,仲要為錢發愁。而舊年又增加咗新冠肺炎,更多人嘅生活雪上加霜,而自己同屋企人嘅生活有幸過得唔錯,所以「希望能為社區付出微薄心力。」

Omar之前經營嘅癌症中心從來無因為患者缺乏保險或資金而拒絕為對方睇病,佢亦希望為患者結清債務後,「今年生活能稍微輕鬆一點,讓他們有餘裕面對人生其他挑戰」。

圖:網上圖片