一到冬天,唔少地方都會落雪、結冰,英國北愛爾蘭有民眾最近喺弗馬納郡同蒂龍郡一帶遇到超罕見現象,樹木竟然生出好似白頭髮同棉花糖嘅純白「髮絲冰」(hair ice)。專家話,呢種冰要喺特定條件下先會形成,而且好易融化,網民大讚奇景可遇不可求,形容係「大自然的鬼斧神工」。

髮絲冰又叫「霜花」(frost flower),一般出現喺腐爛嘅樹木枝幹上,需要喺潮濕環境、低於0℃先可以形成,但只要被手掂到或接觸陽光,就會融化,所以好難見到。科學家發現髮絲冰嘅形成係由於植物表面嘅真菌,結冰形成直徑約0.01cm嘅細絲,望落就好似頭髮一樣。有網民表示好想伸手摸下呢啲髮絲冰,亦有人讚嘆係「大自然的鬼斧神工」,同時鼓勵當地市民外出時不妨多留意,話唔定有機會見證奇景。

圖:Twitter@KennyAllen18