第四波疫情爆發，康文署轄下遊樂設施及公園都暫停開放。唔少家長就帶小朋友到農莊玩，親親大自然。不過，近日WhatsApp家長群組就瘋傳一條短片，一名4歲小朋友餵羊時，被羊快速衝撞倒地，有家長就表示：「天水圍綠田園嘅羊會撞小朋友架！」、「我細仔撞到成個瞓低左」。

該名被羊撞小朋友嘅媽媽表示，事發喺去年12月28，正值聖誕假期就帶兒子到農莊玩。點知仔仔餵羊時，有羊突然「用角撞小朋友心口令佢瞓低，羊用隻腳再踏到小朋友大髀」，令佢覺得好嚇人。事後，該名媽媽表示兒子「無咩事」，回家檢查時無紅無腫，反應亦正常。 

該名媽媽又表示，「隻羊撞完我仔後，又撞一個7歲左右嘅小朋友，由媽媽抱住跑走咗」，佢之後亦叫停咗幾個想餵羊嘅小朋友，「下次唔知會撞到邊個架麻」。佢指出，到處都搵唔到農莊負責人。而在場工作人員表示，「農莊平日沒有太多人，因此才會放養羊隻，一到假日便會困起」，冇諗過連平日都會有大批遊客到訪。 

該名媽媽其後就喺Facebook專頁「天水圍綠田園」上留言，表示雖然小朋友只係受到驚，身體未有大礙，但期望農莊可以注意安全，唔希望再有相同事件發生。有家長就認為，相信近日因假期遊人眾多，園內自由活動嘅羊群或因現場人多而受驚，建議場地應加設圍欄或控制入場人數，以策安全。

圖片來源︰由影片中擷取; Facebook@天水圍綠田園

農莊內嘅羊群。