在囚人士雖然犯過錯,但只要佢哋有悔過、改錯嘅心一樣可以幫到有需要嘅人。美國加州薩利納斯一個高中生Sy Newson Green,喺幾年前因父親需心臟移植、母親失明而需肩負巨額醫療費用,令佢無力負擔一年1.29萬美元(約10萬港幣)嘅學費。而出手資助Green嘅,正正係Soledad州立監獄嘅在囚人士。

據美國媒體報道,Green學費嘅資助計劃嚟自母校Palma School推行7年嘅「同理心運動」(Exercises in Empathy),呢個計劃衍生自學校同監獄之間嘅圖書交流計劃。當Soledad州立監獄嘅在囚人士得知Green嘅情況後,每日通過做文書記錄等日常工作,賺取每個鐘8分美元(約港幣6.2)嘅微薄工資,慢慢積少成多,一共捐咗2.4萬美元(約19萬港幣)俾Green。加埋其他善心人士嘅捐款,3年間共籌得3.2萬美元(約港幣25萬),幫助Green度過難關,成功畢業兼升讀大學。Green近日受訪指獲在囚人士資助學費感到「非常意外,同時也是高度榮幸。」而佢嘅爸爸得知後更忍唔住感激痛哭。

宜家已經出獄嘅Jason Bryant曾係「同理心運動」獎助金計畫發起人之一,佢表示佢哋發起計劃嘅動機係希望為下一代作出貢獻,目前約有2000名在囚人士參加呢個活動,其中約有三分之一在囚人士同意每年捐款兩次,絕大多數捐款金額喺五至十美元之間。佢仲話:「我們生活中曾做出最糟糕的決定,希望成為美好事物的一部分。如果更多的人決定做美好的事情,那麼這個世界將變得更美好。」

圖:網絡圖片(Green擁抱參與「同理心運動」嘅捐助者)