旅遊業喺疫情下冰封，連帶服務香港過百年嘅人力車，都不得不喺時代巨輪下戛然而止。被稱為「香港最後一個人力車伕」，年屆70歲嘅洪伯表示，隨住身體轉差，加上疫情令旅客絕迹，佢已經接近一年無拉車，去年決定退休。

拉車超過50年嘅洪伯指，感覺現時市道比03年沙士時期仲差，亦擔心外國旅客將來未必再來香港。洪伯話，人力車行業喺踏入千禧年代後已經開始衰落，內地旅客好少光顧人力車，加上中環天星碼頭搬遷後，附近旅客人流大減。洪伯對於未能傳承人力車文化，感到好無奈同可惜。 

運輸署表示，冇停止簽發新嘅人力車牌照，但牌照附帶條件，包括人力車只可以喺指定路線及時間行走。