全世界嘅人都度過咗一個不一樣嘅2020年,嚟到2021年,梗係希望世界可以重回正軌,過返無疫情前嘅生活喇。香港天文台亦都喺交媒體發文祝福2021,其上載嘅附圖更被網民like爆有創意又暖心!

香港天文台1月1號喺facebook專頁發文指,「大家經歷咗相當不一樣同充滿挑戰嘅一年」,雖然未知新一年會點樣,但正所謂關關難過關關過,籲大家「記得keep住信心,keep住堅忍,keep住盼望,相信最終都會等到雨過天青㗎。」文末仲標籤咗7首廣東歌歌詞激勵大家,包括「無論歷盡幾次浪」、「除了挫折面前仍有路」、「別忘掉原是靠堅持醫好每個傷患」、「未懼命運就用力纏鬥」、「終於會等到夢寐」、「這曠闊天空又再次開朗」、「無懼的再去做我」,非常貼地。

網民紛紛讚好留言:「好鍾意天文台呢個設計,好幸福呀」、「好暖啊」、「好鍾意個公仔,個樣好鬼馬」,不過亦有網民擔心:「唔好落晒呀…落晒下年點算?」天文台對此就回應話:「定啲嚟,隊長大把貨」。

圖:FB@香港天文台HKO