唔少人覺得做老師人工高、假期多,係份筍工,不過老師背後嘅辛酸真係鮮為人知。美國德州一位老師Alejandro Navarro不幸患上重病,直至佢離世前一日仍堅持喺病床上改功課,可謂鞠躬盡瘁。佢嘅女兒喺社交平台發文指,爸爸走到人生盡頭依然堅持盡為人師表嘅責任,更心痛佢工時長,呼籲大家善待老師。

Alejandro Navarro係一位中學數學老師,上個月因健康急轉直下,被送入醫院接受治療。佢女兒Sandra A. Venegas話,爸爸知自己要入急症室,所以帶咗手提電腦、叉電器,放便入院時繼續工作。Sandra表示,即使喺爸爸臨走前一日,佢擔心嘅依然係學生嘅進度報告評分。仲話佢哋最後一次見面嗰陣,爸爸仲喺度埋頭苦幹,Sandra甚至想熄咗佢部電腦,等兩父女可以好好享受最後嘅時光。

Sandra指出,好多老師成日要OT,就算喺新冠肺炎疫情期間,依然擔心未能完成職責,但就好少有人留意到呢點。佢建議:「如果大家的另一半是老師,請你為他/她設下工作時限;如果你的父母是老師,請禁止他們回家後繼續工作。」Sandra最後呼籲大家善待老師,唔好將超時工作合理化,更表示「你在職場可被人取代,但你在家庭卻無可取代。」

圖:FB@Sandra A. Venegas