過去一年嘅聖誕節受新冠肺炎影響,大家都減少見面聚會,更有人要獨自過節。意大利一位94歲嘅伯伯Malavolti Fiorenzo就係其中一人,佢選擇向警察求助,話自己咩都唔缺,「就差一個能跟我一起舉杯慶祝聖誕節的人。」而當地警察亦好貼心,派咗兩名警員去拜訪伯伯,最後仲一齊舉杯慶祝聖誕添!

伯伯話佢嘅屋企人住得遠,陪唔到佢過節,於是佢就打電話俾警察:「你們誰方便過來拜訪我嗎?即使只有10分鐘也好。」警方問咗伯伯地址後真係派咗2名警員前往拜訪。警員嚟到伯伯屋企發現佢好精神,仲同佢哋講好多二次世界大戰時期,自己岳父擔任元帥發生嘅軼事。警察協助伯伯同佢年長嘅親戚視像通話,3人更一齊影咗張舉杯慶祝聖誕嘅合照。

警察之後將呢個經歷分享到社交平台上,表示「很榮幸送出這美好的聖誕禮物。」呢個post獲得近2萬人讚好,有網民留言指:「今年尤其需要這樣溫暖的故事。」

圖:Twitter@_Carabinieri_