俗語有話︰棒下出孝子,慈母多敗兒。但時移世易,呢套教育方式已經唔適用於當今社會,仲會分分鐘出事。

近日就有網民喺Facebook群組「西貢人日報」分享相片,相中可見,三色回收桶側邊嘅大型高身垃圾桶,一名女子頭戴鴨嘴帽及手持斜孭袋,手上抱住一名孩子,相信兩人係母子,港媽疑似將兒子掉入大型垃圾桶內作懲罰。發帖者表示,「揼個小朋友入垃圾桶作懲罰,喊得好淒涼」。

有關帖文喺其他網上討論區被轉載及引起熱議,網民紛紛鬧阿媽教仔方法唔人道,有虐兒之嫌。有網民留言表示「有冇人性?」

另外,更多網民擔心疫情下影響孩子健康,垃圾桶有大量垃圾,包括口罩、紙巾,小朋友喺垃圾堆內,會有機會沾上唔同嘅細菌同病毒。網民斥責媽媽有問題,唔保護孩子,反而令孩子暴露喺風險中,留言指媽媽「自製垃圾桶群組」,又指呢個教仔懲罰係「無腦」。 

圖片來源︰Facebook@西貢人日報