口罩呢一年嚟已經成為全球人出門嘅必需品,口罩保護我哋嘅同時亦製造咗塑膠污染,威脅海洋生物嘅生存。海洋保護組織Oceans Asia嘅報告指出,估計今年全球有15.6億個即棄口罩流入大海,需要450年時間先可以分解,組織呼籲市民適當棄置口罩,避免流入海洋造成污染。

Oceans Asia發表嘅報告《Masks on the Beach: The Impact of COVID-19 on Marine Plastic Pollution》指,今年全球生產咗520億個口罩,估計至少有3%會流入大海。每個聚丙烯即棄外科口罩平均重3至4克,如不當棄置,就會額外產生4680至6240噸海洋塑膠垃圾。

由於即棄口罩由多種熔噴塑膠製成,成分複雜且有感染風險故難以回收。一旦呢啲口罩被不當棄置,或廢物管理系統不足時,呢啲垃圾就會流入海洋。該組織嘅營運總監表示,呢啲塑膠垃圾每年造成大約10萬隻海洋哺乳動物、海龜死亡,超過100萬隻海鳥死亡,甚至仲有更多魚類、無脊椎動物等死亡。呢啲污染唔單止對漁業、旅遊業有負面影響,每年造成嘅全球經濟損失更估計達130億美元。

組織呼籲各地政府實施鼓勵使用可重用口罩嘅政策,研發即棄口罩嘅可持續替代品,建立、改善廢物管理系統,並透過教育、增加罰款等方法令公眾可以正確處理口罩。 

圖:oceansasia