新冠肺炎疫情雖然拉遠咗人與人之間嘅社交距離,但就阻隔唔到我哋嘅心靈距離。美國俄勒岡州有一個3歲嘅小朋友,每日都會等一位送信嘅郵差叔叔,隔着玻璃窗同佢一齊跳舞。小朋友活潑可愛嘅舞姿,郵差叔叔陽光燦爛嘅笑容,一掃疫情期間嘅陰霾,為生活增添生氣。

小朋友嘅爸爸David Whitlow喺社交平台分享囡囡Ava跳舞嘅短片,影片可見Ava跪喺沙發,望住窗外,似係等緊人。當佢發現嚟送信嘅郵差叔叔Simon Ian後,即刻起身,開始向窗外招手,然後手舞足蹈。而窗外嘅Ian一臉笑容,熱情回應Ava嘅舞蹈,兩人會互相模仿對方嘅舞姿,開心共舞。David表示,Ian係個異常有趣嘅郵差,總係笑容滿面,熱情咁向每戶鄰居打招呼,相當鼓舞人心。

圖:TikTok@Dr.David D.C