香港非牟利環保團體EcoDrive同韓國兒童教育娛樂卡通品牌Pinkfong合作,製作咗一首新嘅《Baby Shark》歌曲《No Single-Use Plastic》,希望透過歌曲改變小朋友生活習慣,減少用塑膠,從而改善海洋污染問題。

香港每日丟棄嘅塑膠垃圾超過2000噸,其中有大部分係即棄塑膠,如膠樽、飲管、餐具、塑膠袋、包裝袋同發泡膠餐盒,物品平均使用時間唔會超過半個鐘,但喺地球就停留幾千年,造成污染。團體相信,疫情令今年產生更多即棄垃圾。 

大部分海洋廢棄物都係即棄塑膠,海洋生物每日要承受著塑膠所帶來嘅傷害。EcoDrivePinkfong希望透過呢首歌令小朋友產生同理心,更有動力關心生態環境及改變生活習慣,令海洋生物有一個更好嘅生活環境。 

當海洋受到污染,食用嘅魚、呼吸嘅空氣同種植食物嘅土壤,都會含有微塑膠。團體希望呢次活動除咗教育兒童減少用即棄用品外,亦希望透過小朋友嘅聲音提醒身邊朋友及大人要由自身開始減廢。

Pinkfong指,今次係第一次同非牟利公益性組織合作,所傳達嘅訊息好明確,即棄塑膠用品污染城市同海洋,並對環境造成嚴重傷害。需要大家採取行動,令下一代可以生活喺一個安全同具有可持續發展性嘅世界。希望透過今次嘅合作提倡改變,及重新思考大眾習以為常嘅生活方式。

歌曲《No Single-Use Plastic》︰

https://www.youtube.com/watch?fbclid=IwAR2QBK_5Tq7jX3qZ6AyFzsbl7P7-vIjivevWjkO-dF-UGGpng9ps4nUXaf0&v=3XYQjwedyzY&feature=youtu.be

圖片來源︰Pinkfong