平時出去食嘢、飲嘢,見到買一送一、免費無限添飲呢啲咁筍嘅活動梗係會買多兩件、飲多兩杯,但係呢啲優惠喺英國可能好快會被禁。事關英國首相約翰遜自從感染咗新冠肺炎之後,深感肥胖好影響健康。而為咗減少國民肥胖嘅問題,約翰遜決定打擊垃圾食品,仲有意喺2022年擴大控管,嚴格禁止垃圾食品以「買一送一」、「買二送一」等方式促銷,餐廳亦唔可以提供含糖飲料嘅免費添飲。

據有關數據顯示,英國有63%成年人有肥胖問題,而每3名學童入面,就有1人過重。英國通訊傳播管理部門喺今年7月曾提出一系列管制,包括夜晚9點前禁止播放垃圾食品嘅電視廣告等。

據外媒報導,英國將禁止業者,針對高脂肪、高糖、高鹽嘅食品例如蛋糕、薯片、披薩等,做買一送一或買二送一嘅促銷活動,餐廳亦唔可以提供免費添飲含糖飲品嘅服務。

英國衛生部認為,新冠肺炎嘅大流行顯現出國民減重嘅必要性,因為體重過高嘅人染疫後嘅死亡率更高。而首相約翰遜本人以往對打擊垃圾食品等相關法規唔係好重視,但喺佢感染新冠肺炎後就驚覺減磅嘅重要性。

圖:網上圖片