自新冠肺炎爆發以來,大家嘅衞生意識都提高咗,盡量避免接觸公用設施,不過連巴士嘅落車鐘都懶得撳,導致飛站又要鬧司機唔停站又真係幫唔落。有網民喺facebook群組「屯門公路塞車關注組」發帖指,有乘客要落車但唔撳鐘,搞到司機要站站大聲問有無人要落車。網民稱呼呢種乘客為「佛系乘客」,要「用念力話比司機知我要落車」。

網民指搭呢班巴士每日都係自己撳鐘,其他乘客就「我等你撳,你等我撳,大家鬥唔撳」,車上有乘客更加要等司機大聲問有無人落車先肯撳鐘。此文一出,唔少網友分享自己嘅類似經驗,話曾經有司機因為乘客唔撳鐘而飛站,最後被乘客鬧爆,反問「呢個係大站實好多人落點解你唔停車?」網民最後總結留言指,可能巴士司機以前因為無人撳鐘而飛站被人投訴過,所以驚咗班乘客先站站問。

圖:FB@屯門公路塞車關注組