今個聖誕大家過成點呢?雖然話因為疫情關係大家要保持社交距離,但依然可以留喺屋企同至愛嘅家人一齊過,不過對於在囚人士嚟講,享受家庭樂卻係一種奢望。為咗幫在囚人士添上一份溫暖,懲教署今年聖誕節前首次喺赤柱監獄,利用資訊科技,結合視像應用同遊戲程式,安排咗喺赤柱監獄服刑嘅在囚人士同身處旺角輔導中心嘅子女同步「踩單車」,一齊過聖誕。

參與今次活動嘅在囚人士有45歲嘅阿成(化名)、阿政(化名),阿成7年前因「販運危險藥物」罪被判監禁,仲要喺聖誕節前夕被還押候判。咁多年嚟,佢一直為未能同仔女過節而遺憾。阿政亦育有一名15歳嘅兒子,阿政平時比較寡言,好少同兒子溝通。佢入獄後,每當見到兒子探望時流露出嘅失望眼神,佢開始反思同兒子過去嘅相處方式。

活動當日,阿成同阿政喺獄中踩住智能單車,透過互聯網,喺電子屏幕上可以見到遠在旺角輔導中心一齊踏單車嘅仔女。雙方喺賽道上爭分奪秒,不時透過屏幕互相揮手,打氣鼓勵。佢哋一啲都唔在乎邊個勝出,而係珍惜呢一刻短暫嘅「團聚」。


(阿政)


(阿政家人)


(阿成)


(阿成家人)

圖:懲教署提供