新生命為大家帶來新希望。今年聖誕雖然不及以往熱鬧，但事在人為，台灣亞東醫院產房嬰兒室就為啱啱出世嘅寶寶們著上可愛聖誕裝，令BB及家屬們都留下美好回憶，舉動令人非常窩心！ 

綜合台灣傳媒報道，亞東醫院產房嬰兒室楊詩蘋護理長表示，「疫情下醫護人員情緒都高度緊張，而且醫院設有陪探病制度」，令有啲新生兒家屬無辦法到院探視，院方為咗令其他家屬都可以參與其中，就特意喺聖誕佳節舉辦「嬰兒室聖誕快閃活動」，希望無論係家長定醫護人員，見到寶寶們可愛模樣，可以暫時放低內心壓力。 

楊詩蘋表示，醫院藉「嬰兒室聖誕快閃活動」，為新生嬰兒著上專屬新生兒嘅襪同聖誕帽，象徵每位寶寶都係爸爸媽媽喺聖誕節所收到最好嘅禮物。又指，「25號前生嘅寶寶，只要得到家長同意」，院方都會為寶寶們著上聖誕佳節服裝，一齊迎接快樂聖誕。

醫院發佈嘅圖片可見，著上聖誕裝嘅新生嬰兒，靜靜地訓喺育嬰室推車上呼呼大睡，模樣非常可愛。有唔少網民表示，見到BB相覺得「超級療愈」，為在疫情下嘅聖誕帶來窩心一刻。

圖片來源︰台灣亞東紀念醫院