人貴在堅持,但要堅持做一件事從來都唔容易,江西一間髮型屋嘅老闆黃水秀就做得到。佢每月16號都會去老人院幫老人家免費剪頭髮,呢個習慣佢足足堅持咗24年。究竟係咩原因?

原來黃水秀嘅媽媽之前喺老人院食堂工作,有一次佢去探媽媽嗰陣,見到一位失聰又行動不便嘅老人家,想出去剪頭髮但又出唔到門。黃水秀深受觸動,決定定期嚟老人院幫老人們剪頭髮。由1997年3月開始,黃水秀都會將每個月15號嘅收入用嚟買物資,然後16號去探訪老人院,免費幫老人家剪頭髮。

直至2000年7月,黃水秀因病要做手術,缺席同老人家們一個月一次嘅約定。估唔到,有兩位老人家竟然專程搭個幾鐘頭車嚟探黃水秀,仲有唔少行動不便嘅老人家聯名寫信關心黃水秀嘅病情。黃水秀話:「我特別的感動,意外,他們把我當成親人一樣,感覺到以後繼續為他們服務,太感動了。」20幾年來,黃水秀走遍城鄉十幾間老人院,幫助超過2000幾位老人家剪髮,佢表示:「能滿足別人的需要,自己感覺到非常的開心。因為每個人都會老,當我老了的時候有人來看望我,我自己會很開心的。」

黃水秀嘅善舉亦感動咗唔少人,好多人都會捐贈舊衣物俾黃水秀,黃水秀清洗、晾晒、縫補、消毒、整理過後,會轉贈俾老人家、貧困戶、山村小朋友等有需要嘅人。

圖:微博@央視新聞