噚日屯赤隧道正式通車,以後由屯門去機場就快得多!不過,咁係咪代表屯門公路交通問題會得到解決呢?相信好多屯門人都有保留!但即使交通問題仍未解決,對於屯門居民嚟講,呢度係佢哋安居嘅地方,自有其吸引之處,或者屯門就係香港嘅寫照,總叫人又愛又恨!

不論日夜 經常塞車

林先生住喺屯門20年,每日都要坐巴士到區外上班,經常要經歷塞車之苦,一程往往要一個多小時!佢認為屯門交通最主要嘅問題來自屯門公路:「屯門當日設計原意係自給自足,居民唔使離開本區,但現實係好多屯門人都要出去返工,以致屯問公路好多車,只要某啲位發生意外,即使唔係好嚴重,都一樣會導致塞車或慢駛。」佢又指,返工嘅繁忙時間,主要轉車站有好多巴士進出,但空間不大,巴士會排長龍,亦係導致塞車嘅原因。

佢亦覺得區外人對屯門人嘅苦處唔係太理解,亦睇唔到政府認真看待呢個問題:「更有立法會議員覺得屯門公路問題唔算嚴重,仲話:印度咪仲嚴重!」

而家住元朗嘅「油樂牆」負責人Tony,近期因為要到屯門創作壁畫,經常出入屯門,亦終於了解到屯門人嘅苦處:「呢排因為工作關係,多咗入屯門,發現屯門公路任何時間都會塞車,無論日與夜,都唔會好暢通!」佢仲話,以前啲人話屯門返工好辛苦,自己都唔係太明白,但佢依家終於體會到!

因此,佢今次創作「屯門上河圖」,其中一個「景點」就係屯門公路,佢仲專登喺屯問公路上畫咗大家騎牛外出,以表現屯門人返工嘅苦處!

屯赤隧道通車 未能解決問題

林先生亦認同,近年屯門交通多咗選擇,唔一定要坐巴士,例如屯馬線,都一定程度有疏導作用,但問題始終無認真解決過。對於屯赤隧道通車後,可以快啲去到機場同大嶼山,林先生認為對改善屯門交通幫助唔大:「去東涌嘅話會有幫助,對疏導交通亦會有少少效果,但係咪代表屯門公路擠塞問題就會無咗,個人有啲保留!其實大部分屯門人都覺得,坐車去港島問題唔大,反而去觀塘等九龍地區卻未必好方便,但去九龍又未必會用到屯赤隧道!」

林先生認為,屯門交通問題會繼續存在,要改變只可以靠城市規劃:「除非屯門本區多啲就業機會,居民唔使離開本區,先可以解決到呢個問題。」

有山有海有商場 壓迫感較低

雖然屯門交通有咁多問題,但林先生仍然好喜歡呢個地方:「我覺得屯門有一個好優勝嘅地方,就係本身好大,區內有購物區,市中心有幾個商場連埋一齊,但只要過一條天橋,又會有好多小店,香港唔係好多地方可以做到呢樣嘢。」佢又指出,屯門有晒所有消閒娛樂,喺屯門可游水、睇戲、行山,又有海邊地方可以俾人漫步:「三聖村夠晒空曠,可以望到東涌,好多人喺呢度慢跑,另外仲有屯門碼頭都唔錯。」佢覺得九龍壓迫感比較大,呢方面屯門就好得多!

Tony為咗創作「屯門上河圖」,早前亦經常搜集資料,希望可以搵出一啲可以代表屯門嘅景點,佢坦言屯門欠缺一啲好地標式嘅景點:「自己家住元朗,起初以為自己會好熟悉屯門,但突然間又諗唔到有邊啲景點可以代表屯門!又例如名產,元朗有老婆餅,但屯門就好似無乜!」

佢認為,屯門有好多景點,例如共融公園同屯門公園,其實都好吸引,只係區外人未必認識而已!所以佢今次選擇將輕鐵、西鐵、屯門公路、三聖村、黃金海岸、咖啡灣、屯門公園及共融公園等景點放入作品中,一方面希望大家對屯門景點有更多認識,另一方面都希望令屯門人有共鳴!大家有興趣嘅話,可以到屯門良景邨社區中心4樓欣賞呢幅作品!

簡單樸素 容易滿足

Tony早前創作「屯門上河圖」嘅時候,亦多咗機會接觸屯門人,佢覺得呢度有種好街坊嘅感覺:「我同當地學校有合作,覺得佢哋嘅師生關係比較鄰里,大家打成一片!」

林先生就認為比較簡單樸素啲:「我哋呢一代屯門人,大部分都係入讀屋邨學校,都係住喺屯門甚至學校附近,因此建立更強Bonding,大家經常一齊消遣,例如散步、踩單車、海邊傾偈,令屯門人更容易滿足,快樂比較容易。」

雖然屯門人容易滿足,但相信佢哋都想屯門交通得到改善,令呢度變成更安居嘅地方,只係呢個願望,究竟幾時先可以實現呢?

圖片來源:LOOOP.HK、油樂牆、政府新聞處、康文署、路政署

屯赤隧道通車之後,由屯門去機場同大嶼山就快捷得多!

屯門公路經常塞車,而且無分日夜!


Tony創作嘅「屯門上河圖」,其中一個「景點」就係屯門公路,佢仲專登喺屯問公路上畫咗大家騎牛外出,表現「屯門牛」嘅苦況!


屯門有唔少海灘,包括圖中嘅新咖啡灣(右)同青山灣。

屯門碼頭一帶設有海濱長廊,景色優美。


林先生認為屯門空間比九龍開闊得多,壓迫感無咁大。

慧豐園側邊嘅屯門海濱公園,係近年屯門最著名嘅景點,可以話擁有屯門最靚嘅海景。


電影《幻愛》海報嘅燈塔,亦係喺屯門海濱公園拍攝。

Tony表示,呢次「屯門上河圖」最大難題係幅畫長得嚟又唔高,64呎X2呎,所以一定要有主次之分,要做到層次。


Tony喺作品中,加入唔少屯門嘅景點,希望大家對屯門有多啲認識,大家可以去屯門良景邨社區中心4樓欣賞呢幅作品。

為咗創作「屯門上河圖」,Tony做咗好多資料搜集。


Tony近期多機會接觸屯門人,佢覺得屯門師生關係比較鄰里,大家可以打成一片!