臨近年尾,小偷特別多,福建漳州一位珠寶商人郭昭軍成立嘅民間反扒手義工團隊就專捉呢啲小偷賊仔。義工隊成立至今共捉咗570幾個疑犯,成為名副其實嘅「竊賊剋星」。

本身係香港人嘅郭昭軍自1997年返祖籍漳州發展,之後仲開咗自己嘅珠寶店。不過珠寶店門口經常發生電單車被偷事件,令郭昭軍非常煩惱,自此開始留心觀察周圍,仲親身參與捉小偷行動。十幾年過去,郭昭軍先後配合警方捉咗400幾個疑犯,因此登上「中國好人榜」。2015年,身為政協委員嘅郭昭軍成立咗民間反扒志願者隊伍——龍溪獵鼠反扒志願者大隊,由郭昭軍做隊長,隊員入面有警察、搏擊俱樂部館長、農民等,後來仲有唔少改邪歸正嘅人。佢哋利用自己嘅工餘時間自發喺午夜巡邏,有時為咗捉賊甚至要埋伏幾十個鐘頭,差啲被人懷疑係賊。

要捉賊,除咗要有膽識、體力外,仲要同賊人鬥智鬥勇,郭昭軍咁多年嚟受傷無數,屋企人亦因佢去捉賊而憂心忡忡。可能係因為屋企人多數從事檢察院等執法部門,郭昭軍細細個就非常討厭小偷小摸嘅行為,佢夢想係見到天下無賊嘅景象。所以佢日頭經營珠寶店,同義工隊隊員喺搏擊館訓練,展開反盜竊普及、教授基礎防身術,夜晚就出動「獵鼠」,對此樂此不疲。

圖:中新網