往年嘅聖誕、新年假期都係海洋公園最熱鬧嘅日子,奈何今年因疫情關係海洋公園需要關閉,大家亦要被逼留喺屋企抗疫。不過,海洋公園就算無開,都為大家準備咗精彩嘅網上活動一齊開心過聖誕!

海洋公園早前率先搵嚟本地著名嘅A Cappella組合SENZA A Cappella,為大家無伴奏合唱聖誕串燒歌。而喺12月24號平安夜,海洋公園將請來兩位主廚教大家煮聖誕美食。12月25號,海洋公園就帶大家走入「夢幻糖果村」感受童話式聖誕。到咗12月29號,將有『「飛」一般聖誕 - 線上玩學互動Live』,由專業嘅海洋公園教育大使帶大家邊學邊玩。雖然大家暫時去唔到海洋公園睇下啲得意動物,但喺下年1月1號,海洋公園將會開live,帶全球最大型嘅齧齒類動物——水豚,同大家見面。有興趣參與嘅朋友,可以上海洋公園Facebook專頁留意詳情,或者去「小紅熊Redd's Nature Play Party」YouTube頻道收睇。就算錯過咗,都可以上海洋公園Facebook專頁重溫架。

圖:FB@香港海洋公園 Ocean Park Hong Kong