自新冠肺炎疫情出現以來,香港科技大學化學及生物工程學系教授及科大(廣州)先進材料學域署理主任高平帶領嘅研究團隊,已經積極研究點樣利用高性能新物料,製造一個既透明又透氣嘅口罩。經過團隊幾個月嘅努力,宜家終於有成果,科大成功研發咗一種極薄嘅聚合物納米薄膜。呢塊薄膜製成嘅口罩原模,對病毒、細菌以及其他粒子嘅過濾效率高達99%。

呢種納米薄膜比同一質量嘅不銹鋼堅固25倍,同時具備透明、透氣同防水特質,更可調教氣孔大小,非常適合製造一款透氣度高、且有高效隔菌功能嘅透明口罩。除咗口罩之外,納米薄膜可調教氣孔大小嘅特性,令有關產品成為目前全球最強效嘅膜蒸餾法(membrane distillation)海水淡化聚合物濾膜,化淡效率唔單止比市面現存產品高出10倍,亦係世界記錄嘅三倍。納米薄膜貼服、防菌、透明堅韌,仲可以用作製造無需每天替換、可以直接喺傷口上塗藥嘅新一代傷口敷料。新研發出嚟嘅納米薄膜仲適用於製造醫療防護產品、太陽能電池及其他前沿科技上。

圖:科大