唔知大家讀書嗰陣,為咗背單詞可以去到幾盡?內地有間高等院校,為咗督促學生惜時如金,鼓勵佢哋積極備考,竟然喺學校廁所嘅廁紙上印英文單詞,等學生辦「大事」嘅時候都可以揸緊時間背單詞!唔少網民表示羨慕,不過亦有網民笑言,學校可能係想學生背識一張紙上面嘅單詞先可以用廁紙。

2021年內地碩士研究生招生考試將至,雲南工商學院近日採用咗活潑嘅方式為學生營造一個良好嘅溫習氣氛。該校學生處處長介紹指,學校為咗幫助學生喺考試前衝刺,鼓勵大家唔好浪費時間,所以喺圖書館同教學大樓廁所嘅廁紙印上英文單詞。學校仲喺圖書館同自習室開設專用嘅複習區,贈送寓意蟾宮折桂嘅桂花糕俾學生等方法為佢哋加油。

有同學表示,以前去廁所會玩手機,但宜家可以用英文廁紙嚟記單詞,每次大約記20個。校方嘅用心獲得唔少學生好評,更有網民表示羨慕,亦有網民感嘆:「學校為了鼓勵學生,也是操碎了心」,更有人笑言:「經親身測試,廁紙的英文字不會印在屁股上」。

圖:微博@昆明高校圈