天生身體有殘缺嘅人,總會遇到較多挫折,變得比一般人自卑。西藏昌都市一個10歲女童熊婉晴天生就無左手,但無阻佢享受生活,單手包餃子、縫襪、雕刻、照顧妹妹等家務熊婉晴樣樣都掂。而面對惡意嘅嘲笑,熊婉晴亦唔自卑,仲樂觀咁話:「管不住別人的嘴,我們可以強大自己的心,大家會做的我也會,大家不會的我還會!」

熊婉晴啱出生嘅時候就已經無左手,佢嘅媽媽指產檢嘅各項指標都顯示正常,唔明白點解佢嘅小朋友會咁樣。不過,熊婉晴嘅父母並無將熊婉晴當成殘疾人看待,只當佢係正常小朋友咁教佢自己著衫、食飯等,亦無交代學校老師要特別照顧佢。熊婉晴好乖,細細個就幫手做家務,洗衫、刷鞋、縫襪,幫妹妹整早餐、綁頭髮通通難唔倒佢,而佢最鐘意嘅就係為全家人包餃子。熊婉晴媽媽話:「所有正常孩子能做的,她都能做。」

至於喺學校,熊婉晴嘅學習成績亦一直名列前茅,佢仲話:「長大了要當一名醫生,救急扶傷,幫助別人。」佢嘅家人好尊重、支持佢嘅選擇,多得呢份家庭力量,令熊婉晴變得堅強,去面對外界唔好嘅聲音。

網民們睇完熊婉晴嘅故事都表示非常感動,留言稱讚:「這孩子說的太好了,管不住別人的嘴,只有強大自己的內心」、「不被生活所打倒,一直在努力著,值得佩服」、「身殘志堅,向她致敬!希望周圍的人都能友好待她」。

圖:微博