今年一啲都唔簡單,疫情影響到好多人生計,社企都受到牽連。

協助長者就業嘅社企銀杏館,面對17年經營以來最困難嘅時刻,直言疫情令生意大跌六至七成。同時經濟下滑令登記領取免費福飯人數急升兩至三倍,銀杏館負責人承認依家係「蝕住做」。

不過,喺呢段時期,佢哋亦見過20幾歲失業青年靠福飯捱過難關,最後重新就業,亦有飯友每日行2.7公里到銀杏館,義務工作3個鐘,銀杏館CEO麥敏媚表示「佢哋覺得可以自力更生,我哋希望幫人,最後佢哋幫到自己。」 

麥姑娘表示,今年疫情反反覆覆,銀杏館六家分店受到不同程度的影響,人流大跌六至七成。政府勒令食肆六點後禁堂食後,人流更少,飯堂一半人坐都冇,但登記免費福飯嘅人數就有增無減,以油麻地分店「越老」為例,今年初只有三至四百人登記,如今激增到一千一百至一千二百個之間,但又可以減少派飯,為咗可以繼續經營,要不斷改變策略。又舉例指,安排晚巿同事調到早更工作,唔係街友嘅義工就減少幫手,聖誕到會服務由八人以上大餐,改到一人餐或四至六人餐,目的就係可以令到人人有工返。

現時餐館接受外界捐助,每捐2838蚊,機構承諾會向一名飯友提供一頓熱食或飯餐連湯及生果,冬至甚至加餸。由長者廚工製作「愛心一人前飯盒」,除咗規定有蝦、雞及冬菇等傳統冬至餸菜外,主菜仲會適量調配羊架、雞髀或豬手,希望街友喺冬至過得豐盛啲,成本其實已經遠超巿民捐贈嘅38蚊一個,目前已獲社福機構訂購超過一萬個,喺冬至正日送俾服務對象。 

有意向銀杏館捐助福飯,或想訂購聖誕餐嘅巿民,詳情如下︰ 

餐單詳情:https://bit.ly/2UnfT6p 

WhatsApp查詢/訂購:5117 7695 

熱線電話:8209 3088 

圖片及資料來源︰銀杏館