雖然疫情肆虐,但聖誕臨近,大家總會想買啲聖誕禮物慶祝一下!其實想買禮物,都唔一定要去大型連鎖店,因為香港九龍有兩條玩具街,就係唔少港人準備禮物嘅首選之地! 

太原街

太原街位於灣仔莊士敦道同皇后大道東之間,原本只係區內居民購買食品雜貨之地,但1990年代,街上開設咗幾間銷售具收藏價值玩具嘅店舖之後,太原街就成為潮流人士必到之地,更被稱為「玩具街」。

現時太原街仍有唔少玩具店,雖然無五星級裝潢,但有千奇百怪嘅玩具,非常密集嘅陳列方式,逼得顧客水泄不通,有啲玩具老店仲有唔少珍藏,要一一仔細去逛去挖先有機會執到寶架。

更有趣嘅係商鋪陳列玩具品種充滿季節特色:暑假期間,整個舖面幾乎都會被水泡、浮床、沙灘波等包圍,到咗春節就有吉祥玩具,復活節、中秋節、萬聖節、聖誕節,亦會放滿應節玩具!喺灣仔工作嘅一名女子就表示,每逢節日,例如中秋、聖誕等,都會到太原街逛逛,而佢特別喜歡其中一檔排檔:「呢度專賣節慶產品,跟得好貼,幾乎每日賣嘅嘢都不同。」

太原街一帶亦係香港少數仍保持早年街市特色嘅區域,棲身樓梯底嘅小店鋪,跟大型連鎖店完全唔同,行人路旁仲有唔少排檔,灣仔區議員李碧儀亦表示,太原街市集嘅一大特色,就係好多檔主都係灣仔老街坊。因此,穿插於呢啲小店之間,細聽老店東訴說當年,懷緬當年歷史,你就會發現香港仍有一番別樣嘅小城風味。

李碧儀亦表示,近年呢一帶環境改善咗:「以前排檔要向商舖借電,有啲雜亂無章;早幾年推出資助計劃,整頓排檔,令市集得以活化,現時排檔有獨立電錶,改善防火,商舖同排檔亦執過位置,行路舒服咗,影響居民亦都少咗。」

為咗推廣太原街,李碧儀表示區議會都有好多計劃:「由於太原街好多年歷史,區議會曾諗過設立牆匾,但要考慮地理因素,我哋亦希望加番個指示牌,方便遊人嚟呢度逛。」

不過佢表示,受到疫情影響,太原街嘅人流同生意一定受到影響:「但大家都知道呢度大時大節會售賣應節產品,而且出名價廉物美,所以商販暫時都搵到兩餐。」佢亦指,灣仔係一個繁忙社區,人流好多,所以佢希望商販貨品唔好佔用太多公共空間:「人流唔流通,人迫人,啲人反而唔敢嚟行。」

福榮街

至於另一條玩具街,就係深水埗嘅福榮街。福榮街並唔算短,分成南北兩段,其中南昌街至北河街一段福榮街就被稱「玩具街」,因為呢度有幾十間售賣玩具及精品的專門店,部分兼營批發及零售生意。每逢假日或暑假,大批家長就會帶同小朋友嚟逛街尋寶。

福榮街嘅玩具店比太原街更多,當中有啲仲係專賣兒童玩具添,由於價錢都比較實惠,所以好多人都會嚟買幾件玩具俾小朋友。而每到節日,成條街都放滿節日裝飾,令呢度充滿節日氣氛。

深水埗地膽Ivan就表示:「我通常買禮物、揀禮物嘅時候,例如聖誕、生日,都就嚟福榮街睇吓!因為呢度禮物集中地,而且好多新奇得意嘢睇。」Ivan覺得,深水埗比較平民化一啲,唔會好精緻:「而且呢度分類唔會好仔細,好納雜,嚟呢度有種尋寶嘅感覺。」

不過佢亦坦言,近年多咗唔少選擇,例如Donki開咗之後,應該會搶走唔少人客,而且佢覺得福榮街仲有好多可以改善嘅地方,「現時福榮街有啲亂,希望呢度可以乾淨一啲,貨物唔好擺得太出!」

香港有特色嘅社區愈嚟愈少,希望大家可以好好珍惜,令呢啲特色社區能夠繼續保存落嚟,展現香港嘅特色!

圖片來源:LOOOP.HK、FB@李碧儀

太原街位於灣仔莊士敦道同皇后大道東之間。


由莊士敦道行入太原街,即刻發現好多應節商品。


現時太原街仍有幾間玩具店,充滿千奇百怪嘅玩具,加上密集嘅陳列方式,要仔細去逛去挖先有機會執到寶架。


行人路旁仲有唔少排檔,售賣嘅商品仲跟得好貼。


商鋪排檔嘅商品都充滿季節特色,臨近聖誕,自然放滿聖誕樹。


灣仔區議員李碧儀表示,太原街市集嘅一大特色,就係好多檔主都係灣仔老街坊。而且經過整頓之後,令市集得以活化。

南昌街至北河街一段福榮街,有幾十間售賣玩具及精品嘅專門店,因而被稱「玩具街」!一到節日,就好有氣氛!


不過部分貨品擺到出馬路,搞到環境有啲亂!