香港大約有15萬名聾人及弱聽人士，當中只有3,900人識手語。大部份聽障人士喺日常生活中，除咗以助聽器輔助盡量聽外，亦都會透過讀唇、手同表情與人溝通。但喺新冠肺炎疫情下，人人戴口罩，對聽障人士黎講，傳統口罩阻礙讀唇，無疑造成障礙。雖然用醫護級透明口罩可以解決到溝通問題，可惜現時透明口罩每個售價達港幣17蚊，目前亦未能運送到香港。 

福幼基金會知道聽障人士困難，並籌得首批起動基金後，決定推出全港首個「防霧透明窗醫用口罩」，又名「I-SEE」口罩，希望解決聾啞人士、手語翻譯員、言語治療師等溝通障礙，幫助聾啞人士無障礙溝通。

福幼基金會搵到近15年口罩生產經驗嘅弓立醫療用品合作，確保口罩達到既透明又不失安全嘅ASTM Level 2標準。首批65,000個將免費送贈俾14個服務聾啞人士嘅慈善團體、學校及社企，以及提供手語同言語治療嘅社福機構，包括香港聾人協進會、龍耳等。

圖片來源︰福幼基金會