當地震發生,第一時間梗係要搵個安全嘅地方暫避喇!不過台灣新北一間產後護理之家嘅護理員,遇到強烈地震無自己走咗去,而係先將BB車推到安全位置,然後張開雙臂護住BB。畫面之美好令唔少網民睇完之後大為感動,紛紛讚好。

台灣東北地區喺今個月10號夜晚9時幾發生黎克特制6.7級地震,台灣麗格產後護理之家早前放咗一段影片上社交平台,影片顯示,原本寧靜嘅育嬰室被突如其來嘅地震警報聲打破,窗簾不停震動。而育嬰室嘅2名護理員第一反應係將放玻璃窗旁邊嘅BB車拉去安全位置,並將所有BB車聚集埋一起。之後,再多一位護理員入房間幫手。其中一位護理員輕拍BB,安撫佢受驚嘅情緒,而另一位護理員就彎腰、張開手臂,以身體保護3個BB。

唔少網民看完之後都覺得好感動,讚護理員非常專業:「真是美麗的天使」、「看見好想哭,好感動」、「愛自己的孩子是自己應盡的義務及責任,是強大的愛,但保護別人的孩子真的是無私的奉獻,好感人的畫面。而麗格產後護理之家就回應指,有位媽媽回想起當晚地震嘅情況,非常感謝護理員,「對當下不在寶貝身邊的爸比媽咪來說,瞬間安心了」。

圖:FB@麗格產後護理之家